艺人杨洛婷(Rabeea)与Dear Jane主音老公黄天翱(Tim)育有一女Tanya,成日都话要同老公再落力造人嘅Rabeea,今日终于有好消息宣布,就系佢再佗B,而佢自己就仲未知BB性别!Rabeea喺社交网晒出孕照,见佢肚仔明显凸出,全家着晒红色衫够晒喜庆,Tanya更作势锡锡妈咪肚仔:“❤️情人节快乐!在象征着爱的日子,没甚么比跟大家分享爱的消息更好!我们的第2位情人即将到临。。。究竟他/她将会是‘他的’还是‘我的’前世情人?来看看今天刚在我的短片频道中发布的第1个关于孕期的视频 - ‘宣布怀孕’!诚邀大家关注我的频道,跟我一起度过这个甜蜜孕期!❤️💗”
Rabeea仲拍埋片讲自己发现怀孕嘅过程,佢指自己去年10月左右开始反胃想呕,喺屋企仲搵咗张过期验孕纸嚟验,见到两条线嘅佢都仲系好唔肯定,不过都照同Tim讲,之后佢哋再自行验多几次之后,先决定去搵中医师确认怀孕。兴奋过后Rabeea就开始有唔同嘅怀孕之苦,除咗作呕作闷之外,仲伴随住鼻敏感、失眠、便秘、贺尔蒙失调等,不过照超声波时见到BB畀预期大只,佢哋都一样好开心。而诊所姑娘打嚟问佢想唔想知BB性别知时,佢竟然一口拒绝!
另外,佢亦拍低自己同各方亲友宣布好消息时嘅反应,圈中好友好似唐诗咏、冯允谦等个个都擘大个口,唔敢相信,不过得到大家嘅祝福,Rabeea都话自己好有正力量。
Rabeea受访时表示:“好开心,依家5个月,拣情人节宣布,系因为我成日话想要个前世情人,咁我自己又想神秘啲,仲未打开信封,睇吓自己忍到几耐!预产期喺7月头左右,老公就话可能系女,但我觉得可能系仔呢!畀番个前世情人我啦!”讲到佗B心情,佢话︰“心情都开心,但佗Tanya嘅时候就好似轻松啲,同埋嗰时好瞓得、又好食得,今次佗头3个月都唔系咁舒服。”问佢同老公分房瞓大半年都成功造人?佢再笑话︰“系呀!我老公真系晚晚瞓厅㗎!但系我哋都会把握机会、做好准备,依家香港多咗Staycation,所以我哋都有充足嘅时间、机会,去做我哋想做嘅‘功课’!”Tanya都好期待BB嘅出世,仲叫佢做恐龙BB,问佢出世会唔会食咗自己,非常搞笑!
Tim表示:“短短时间已经收到好多朋友嘅祝贺同关心,感激!好开心呢个新年有一个好开始,借着今日情人节同大家分享呢份喜悦,希望所有人都开开心心。疫情未过,太太呢段时间佗BB要特别小心,当然我都会特别照顾佢同注意安全。”​
|