李嘉欣锺嘉欣都Out？“新”嘉欣Sss极速弹起抢滩

etin

正所谓“唔怕生坏命，最怕改坏名”，宇宙有个永恒定律，就系叫亲“嘉欣”嘅都系靓女兼有运行，由“大美人”李嘉欣、“华姐冠军”锺嘉欣、新鲜出炉“马国视后”龚嘉欣以至“新闻之花”陈嘉欣，同名嘅佢哋一样系靓绝人前！不过新时代降临，娱乐圈慢慢出现“新”嘉欣，呢班后起之秀同样好“嘉欣”！先讲嘅系现年28岁嘅蔡嘉欣，本身系KOL嘅佢喺网上有一定知名度，2019年毅然跳入娱乐圈呢个大染缸参选香港小姐，虽然最后5强止步，但加入TVB后备受力捧，工作量不断，远远多过冠军黄嘉雯！虽然曾经因为1句“感谢疫情”被网民闹爆又被指拜金，但愈战愈勇，现时社交网坐拥14万粉丝！除咗主持节目《姊妹淘》，最近更参演剧集《飞虎之壮志英雄》、《智能爱（AI）人》、《金宵大厦2》，又识得定时喺网上晒性感照冧网民，“钱”途的确一片光明！

凭《全民造星III》成功打响名堂嘅郑嘉欣（Christine）系模特儿，现年28岁，身高1米78，拥有44吋招牌长腿，名副其实嘅9头身，仲有“港版石原聪美”之称，社交网有4.6万追踪者！虽然《造星III》只系入到最后50强，但比赛外就成功脱颖而出，早前更处女下海首次拍剧，不过佢话最爱嘅都系唱歌，唔会放弃歌手梦！

现年只有20岁嘅游嘉欣（游游），凭《#后生仔倾吓偈》开始受人注目，到最近喺《香港爱情故事》更成功弹起人气急升！首次拍剧仲献出萤幕初吻，演技自然不造作大受好评，出道短短2年间更已参与3套剧，包括《香港》、《使徒行者3》及《刑侦日记》！性格直率嘅佢曾自爆系A0（未拍过拖），又唔介意公开透露系“屋邨妹”，直言唔系羞耻嘅事！而嚟紧，佢仲会伙拍一众女神及小鲜肉丁子朗拍摄青春剧，获封为“汤洛雯接班人”！社交网粉丝由不足1,000人，到依家已有3.2万人，真系大把世界呀！​