ViuTV明年3月試播

admin

電盈旗下嘅免費電視台ViuTV今日開記招公佈開台詳情，香港電視娛樂有限公司總經理魯庭暉上台表示成個計劃投放咗3億港元，已經進行咗20個項目，明年3月作24小時試播，4月正式出街，2017年開標清嘅英文台。

魯庭暉謂初時都會試播好大量嘅節目，新聞方面就會用nowTV嘅新聞，不過就唔係全部，可能會係7：3、或者6：4嘅比例，但其他節目都會有同nowTV唔同，主要係自己嘅製作。

問到投資咗幾多錢，魯庭暉就話：「頭6年就13億，頭10年就係27億。」(編按：亞視今年9月宣佈中國文化傳媒國際控股有限公司入主時，宣佈重新申請免費電視牌照，亦將展開6年計劃，斥資51億)

ViuTV成個台都講明由香港出發，為港人製作各類型電視節目，滿足唔同層面嘅觀眾口味，同時亦強調要向世界接軌——唔止咁，仲要同亞視免費電視牌到期日(即明年3月31日)接軌，但都要睇工程部嘅進度如何。依家ViuTV有300幾個員工，而且都有喺唔同嘅地方請人。

問到搵咗啲咩藝人，佢話：「如果請好多人返嚟，未必會係最好嘅事，我哋會有兩個方法處理，第一個係實況娛樂，好似搵個廚師煮嘢食，未必搵藝人煮，而係搵廚師煮，而演壞人就搵壞人演。最主要係請多啲新藝人，畀多啲機會佢。」

魯庭暉又指會有足球睇，問到會唔會係英超？佢就話距離開台仲有半年，所以都唔可以講住，但佢就話：「會有歐洲好好睇嘅盃賽睇。」

至於會唔會起電視大樓，魯庭暉就話唔一定，可能會用一個新嘅思維。至於拍唔拍劇，佢就話：「會買一啲最好嘅劇番嚟，都會有自製嘅劇集，好似依家有個單元嘅製作。」而廣告嘅反應都好好。